„Ég hef áratugalanga reynslu af rekstri, stefnumótun og stjórnun og hef starfað við
fjölbreytt stjórnunarstörf í nær 25 ár. Sem forstjóri BYKO undanfarin 12 ár hef ég öðlast
víðtæka þekkingu á öllum helstu þáttum fyrirtækjarekstrar; þar á meðal stefnumótun,
fjármálum, skipulagsbreytingum, mannauðsmálum og uppbyggingu á öflugum teymum.
Sú reynsla hefur veitt mér yfirgripsmikla og sterka heildarsýn og ég hef öðlast góða
færni í að greina tækifæri, meta áhættu og taka upplýstar ákvarðanir.
Ég er þeirrar skoðunar að árangur í rekstri og stjórnarstörfum byggist ekki eingöngu á
tölum og ferlum, heldur ekki síður á fólki, trausti og góðri samvinnu. Í mínum störfum hef
ég lagt mikla áherslu á leiðtogahæfni, þar sem skýr framtíðarsýn, heiðarleiki og
gagnkvæmt traust skapa grundvöll fyrir árangur til lengri tíma. Ég á mjög auðvelt með
að vinna með ólíkum hópi fólks, virkja hæfileika og byggja upp sterka liðsheild sem nær
sameiginlegu markmiði. Sú reynsla hefur nýst mér vel í krefjandi aðstæðum þar sem
órói og óvissa ríkir og yfirvegun er það sem gildir og leiðir til góðra ákvarðana.
Ég er stefnumótandi og árangursdrifinn að eðlisfari, forvitinn og áhugasamur um að
læra og þróast. Ég trúi því að skýr sýn á eftirsóknarverða framtíð, með fagmennsku og
mannleg gildi að leiðarljósi, sé lykill að sjálfbærum árangri. Í störfum mínum hef ég ávallt
lagt áherslu á að skapa menningu þar sem metnaður, ábyrgð, gleði og samvinna fara
saman við virðingu og hvatningu.
Sú blanda af menntun og reynslu sem ég bý yfir nýtist að mínu mati vel í stjórnarstörfum
þar sem þörf er á heildarsýn, stefnumótandi hugsun, ábyrgð og mannlegum skilningi.
Ég tel mig geta komið með verðmætt framlag að stjórnarborðinu, þar sem jafnvægi milli
faglegra krafna, skýrrar stefnu og mannlegra þátta er lykilforsenda að góðri niðurstöðu.“
